Сентябрь аенда Алабуга районы керәшеннәре үз якларының җыру-бию үзенчәлекләрен, бәйрәмнәрен, йолаларын күрсәтәчәкләр, олы шәхесләре белән таныштырачаклар.
Олы Шүрнәк авыл җирлеге башлыгы, район җирле керәшен оешмасы җитәкчесе Николай Мельников хәбәр итүенчә, айлык барышында Җәкәү йортында Алабуга ягындагы керәшен авыллары тарихы, халкының көнкүреше һәм мәдәнияте белән таныштыру күздә тотыла.
Җәкәү йортындагы музейда сентябрь ае дәвамында Алабуга районының Олы Шүрнәк авылы музееннан китерелгән экспонатларны барып карарга мөмкин булачак.
Шулай ук, Алабуганың – «Ак каз» керәшен фольклор ансамбле (җитәкчесе – Нина Сәлимуллина), Олы Шүрнәктән «Сүрәкә» ансамбле (җитәкчесе – Роза Роева) чыгышлары да көтелә. Алар керәшен мәдәниятен яратучыларны Алабуга ягы керәшеннәренең җырулары, уен-йолалары белән дә таныштырачаклар. Алабуга җырчысы Диләрә Мироваева концертын оештыру ниятләре дә бар.
Алабуга ягының танылган керәшен рәссамнары Илья Максимов белән Виктор Селиверстов мастер-класслар да уздырачаклар.