Казандагы Яков Емельянов исемендәге мәдәни үзәктә «Мәгариф системасында туган тел: педагог, агартучы-мәгърифәтче Василий Тимофеевның тууына 185 ел» дип исемләнгән конференция булып узды.
Бу зур чарада галимәр, укытучылар, мәдәният хезмәткәрләре, фольклорчылар, тәрбиячеләр, төбәк тарихын өйрәнүчеләр, керәшен чиркәве вәкилләре катнашты.
Конференциядә Татарстан Фәннәр академиясенең Ш.Мәрҗани исемендәге тарих институты директоры, тарих фәннәре докторы, академик Радик Салихов, шул институтның керәшен һәм нагайбәкләр тарихын өйрәнү үзәге җитәкчесе, тарих фәннәре докторы Радик Исхаков, тарих фәннәре кандидаты Лилия Мөхәммәдиева, сәнгать фәннәре кандидаты, Татарстанның атказанган сәнгать эшлеклесе Геннадий Макаров, чиркәү тарихы докторы, профессор Алексей Колчерин кебек галимнәр катнашты.
Василий Тимофеев 1836 елда Мамадыш районының Чия башы авылында туа. Керәшеннәргә дини һәм дөньяви белем бирүдә зур өлеш керткән шәхес. Конференциядә чыгыш ясаучыларның күпчелеге моңа аерым басым ясады.
Чыгышларның тематикасы төрле иде. Укытучылар һәм тәрбиячеләр нигездә мәгарифтәге этномәдәният, музей эшчәнлеге, дәрестән тыш эшчәнлек, проект һәм эзләнү эшләрен оештыру, керәшен халкының йола-бәйрәмнәре, туган тел мәсьәләләре темаларын күтәргән. Кайбер чыгышлар онлайн форматта да тыңланды.
Сөендергәне шул: керәшен халкының мәдәниятен таныйлар, фольклорын кулланалар, бәйрәмнәрен беләләр, йолаларын өйрәнәләр. Тик өйрәнәсе мәсьәләләр дә шактый әле.