Казансу яры буенда «Мозаика культур» VIII этноконфессиональ фестивале узды. Аңарда Россиянең төрле төбәкләреннән килгән фольклор коллективлар катнашты. Ел саен әлеге чараны 5 меңгә якын офлайн һәм онлайн тамашачы карый.
Катнашучылар арасында Җырчы Җәкәү йортының резидентлары — «Тумар» вокаль-инструменталь ансамбле дә бар иде. Һава торышының салкынча булуына карамастан, кызлар үзләренең җырлары белән тамашачы күңелен җылытырга өлгерде.
Фестивальдә 8-10 сентябрь «Волга» яшьләр үзәгендә «Культурная мозаика Татарстана» форумында катнашып, сайлау этапларын узган коллективлар да бар иде. Питрәч районының Керәшен Сәрдәсе авылында эшләп килүче «Сәяр» ансамбле дистанцион һәм сайлап алу этапларын уңышлы узып, төп этапта, ягъни Казан үзәгендә үз иҗатын тәкъдим итә алды.
Аннан тыш, фестивальдә күңел ачу программасы — милли киемнәр парады, аш-су, ярминкәләр дә оештырылды.