(11 сентября 2017) 8 сентябрь көнне Башкортстанның Бакалы районында фольклор коллективларның III төбәкара Троицкий фестивале узды. Чарада керәшен мәдәниятын да тәкъдим иттеләр.
Зур чарада керәшен мәдәниятен Татарстанның Мамадыш районыннан “Урагай” һәм “Җиңгәчәйләр”, Чиләбе өлкәсенең Нагайбак районыннан “Гумыр” һәм “Ностальгия”, Башкортстанның Бакалы районыннан “Сөнәкәй”, “Идәш баш” һәм башка ансамбльләр тәкъдим итте.
Программа буенча, фестивальдә катнашучылар башта Дияшево авылының Преображения Господня храмында булдылар. Кунакларны иман йортының настоятеле протоиерей Владимир Кун каршы алып, чиркәү буенча экскурсия уздырды.
Фестивальнең ачылу тантанасы Бакалы районының мәдәният сарае каршында узды. Биредә кунакларны һуш исле ипи һәм тоз белән каршы алдылар. Шунда ук “Осталар шәһәре” дип исемләнгән халык һөнәрчеләре күргәзмәләре һәм милли ишегаллары оештырылган иде. Кунаклар әлеге матурлык белән хозурланып кына калмыйча, тәмледән-тәмле төрле милләт ризыклары белән сыйлана да алды.
Троицкий фестиваленең гала-концерты район мәдәният сараеның сәхнәсендә гөрләде. Фольклор ансамбльләр халкыбызның матур җыруларын яңгыратып, тамашачыда соклану хисләре уятты.
Бу хакта тулырак газетабызның киләсе саныннан укыгыз, әлегә фестивальдән фоторепортаж тәкъдим итәбез.