Халыклар бердәмлеге көнендә «Казан-Экспо» Халыкара күргәзмәләр үзәгенең концертлар залында «Безнең йорт – Татарстан» республика этнокультура фестиваленең гала-концерты узды.
Гала-концертта фестивальнең лауреатларын һәм «Россия халыкларының милли бәйрәмнәре» бөтенроссия фотоконкурсы җиңүчеләрен бүләкләү тантанасы да оештырылды. Бүләкләнүчеләр рәтенә кергән карендәшләребез арасында Биектау кызы Амелия Феофанова һәм Теләче районы Субаш авылының «Нардуган» фольклор ансамбле һәм Балтач районының Субаш авылы мәдәният йорты каршында оештырылган «Туганай» халык фольклор ансамбле дә бар. Аларга фестивальнең Лауреатлары исеме бирелде.
Моннан тыш җыр-бию коллективларының җитәкчеләре, өстәмә белем бирү педагоглары һәм автор җырлары башкаручы егермегә якын кешегә бәйрәм сәхнәсеннән дәүләт бүләкләре тапшырылды. Бүләкләнүчеләр арасында «Бәрмәнчек» керәшен дәүләт ансамбленең сәнгать җитәкчесе Элмира Кашапова да бар иде. Сентябрь азагында аңа Татарстан республикасы президенты указы белән «Татарстан Республикасының атказанган сәнгать эшлеклесе» дигән мактаулы исем бирелү турындагы указ имзаланган, дип хәбәр иткән идек. 4 ноябрьдә Элмира Кашаповага шушы дәүләт бүләгенең медален Татарстан Дәүләт Советы Рәисе урынбасары Юрий Камалтынов тантаналы рәвештә тапшырды.
