Җырчы Җәкәү йортында Яков Емельянов исемендәге «Җәшнә, кояш, җалтыра» конкурс-фестиваленең җиңүчеләрен билгеләү өчен чираттагы жюри утырышы узды.
«Мәртәбәле жюри барлык финалистларыбызның эшләрен карап, фестивальнең лауреатларын һәм дипломантларын билгеләделәр», – дип хәбәр итте мәдәни үзәк.
Исегезгә төшерәбез, жюри членнары май ае башында «Җәшнә, кояш, җалтыра» конкурс-фестиваленең финалистларын билгеләгән иде. Аннан соң жюри финалистлар белән онлайн очрашу уздырды. Һәм 26 май көнне йомгаклап, җиңүчеләрне билгеләде.
Конкурска барлыгы 57 гариза килгән. Шуларның 52се конкурс шартларына туры килә дип табылган.
— «Автор-башкаручы. Җыр» номинациясенә – 10 гариза;
— «Автор-башкаручы. Шигырь» номинациясенә – 16 гариза;
— «Керәшен шагыйрьләре шигырьләрен укучылар» номинациясенә – 22 гариза;
— «Керәшен шагыйрьләре шигырьләреннән әдәби-музыкаль композиция» номинациясенә – 4 гариза килгән.