(31 август 2017) 25-27 август көннәрендә Татарстанның крутушка поселогында урнашкан «Байтик» сәламәтләндерү-белем бирү комплексы территориясендә «Крутушка» IX Халыкара этнофестивале узды. Биредә керәшен халкы мәдәниятен дә тәкъдим иттеләр.
Керәшен җыр-биюләре белән фестивальдә Мамадыш районының Дүсмәт авылы “Җиңгәчәйләр“ фольклор ансамбле уртаклашты.
— “Крутушка” – бөтен кешегә дә рәхәт, күңелле, иркен урын булып чыкты. Анда кайлардан кемнәр генә килмәгән: фольклорчылар, кәсепчеләр, һөнәр осталары, сатучылар, тамашачылар күплегенә хәйран каласың. Барысы да бер-берсен нәрсәгә булса да өйрәтә, мастер-класслар – адым саен. Коллективыбыз белән ду китереп чыгыш ясадык, башка ансамбльләр белән аралаштык, әйлән-бәйлән уйнадык, керәшен җыр-биюләрен башкаларга да өйрәттек… Җәйнең соңгы көннәрендә рәхәтләнеп күңел ачып, бик тәэсирләнеп, дөньяны, башкаларны күреп, үзебезне күрсәтеп, керәшен мәдәниятен, Дүсмәтебезнең, Мамадышыбызның данын яклап кайттык әле бер. Шәп булды!»– ди ансамбльнең сәнгать җитәкчесе, аккомпаниаторы Виктор Спиридонов.
26 август көнне “Крутушка”да Балтач районнан Айсылу Асадуллина мастер-класслар вакытында керәшен гөсләләрендә уйнау үзензәлекләре турында сөйләде.
