Менделеевск районының Илнәт авылында «Песня – душа народа» III Төбәкара фестивале узды.
Фестивальдә Менделеевск кына түгел, күрше-тирә районнардан һәм Удмуртинең Грахов, Алнаш районнарыннан фольклор коллективлар һәм соло башкаручылар җыелды. Һәр катнашучы үз милләтенең культурасын тәкъдим итте.
Керәшен халкының милли традицияләрен күрсәтеп, Иске Гришкин авылыннан «Бигәшкәй» балалар коллективы, «Бигәш» халык ансамбле солисткасы Ксения Япаева, шулай ук, Менделеевск районының Сәйтәк авылы мәдәният йорты каршында эшләп килүче «Карендәшләр» ансамбле чыгыш ясады.
«Бигәшкәй» ансамбле «Думбыра» композициясен башкарып, 2 нче урын лауреат исемен яулады. Ксения Япаева «Ай, җаный» җыруын җырлап, 1 нче урын лауреат булды. Ә «Карендәшләр», шулай ук, фестивальдә уңышлы чыгыш ясап, үз номинацияләрендә 2 нче урынлы лауреат исемен алды.
