Казанның Горький паркында «Древо жизни» проектының чираттагы бәйрәме узды. Аның төп максаты – Идел буе халыкларының туган телләрен һәм традицион мәдәниятен саклау һәм популярлаштыру гына түгел, ә республикабызда яшәгән төрле милләт вәкилләренең дуслыгын да күрсәтү.
Теләче районы Субаш авылының «Нардуган» керәшен халык фольклор ансамбле үзләренең моңлы җырулары, дәртле биюләре белән бөтен җыелган кунакларны таң калдырды. «Нардуган»ның иң матур бизәге булып «Кряшен чибяре — 2023» Анжелика Павлова чыгыш ясады.
«Нардуган»ның чыгышларыннан соң кунаклар каршына «Zakaria» фолк-төркемен чакырдылар. Аларның керәшен, нагайбәк, мишәр көйләреннән торган җырларын башкарулары, чын мәгънәдә, халыклар дуслыгын күрсәтә.
Җыелган кунаклар өчен керамика, балчык, керәшеннәрнең «тамакса» ясау буенча остаханәләр эшләде. Биредә шулай ук керәшеннәр, Пермь татарлары, мишәрләр, этник киемнәреннән торган уникаль экспозияция тәкъдим ителде.
