1-21 март көннәрендә ВКонтакте социаль челтәрендә «Керәшенчә марафон» узды. Аңа республикабызның төрле районыннан 39 карендәшебез кушылды.
Марафончылар, көн саен аерым бер тема кысаларында, үзләре, нәселләре белән таныштырды, йөрәк түрләрендә булган иң кадерле истәлекләре белән уртаклаштылар. Гаилә мирасы, аш-су, балаларга керәшен тәрбиясе бирү, язучыларыбыз, артистларыбыз, дин, фольклор буенча мөһим постлар урнаштырдылар. Бу язмаларны ВКонтактеда #керәшенчәмарафон #туганайлармарафоны дигән хештеглар аша кереп укырга була.
25 май көнне «Керәшенчә марафон»га йомгаклар ясала, марафончылар Казанга җыела. Аларны республика матбугаты йорты – Татмедиа бинасы буенча экскурсия көтә. Аннан соң, Я.Емельянов исемендәге мәдәни үзәккә юл тотачаклар. Анда рәссам Михаил Кузнецовның күргәзмәсе белән танышканнан соң, дипломнар, бүләкләр тапшыру чарасы булачак. Очрашу кичәсенә Татарстанның халык артисты Георгий Ибушев, Татарстанның атказанган артистлары – Олег Фазылҗанов, Оксана Дмитриева һәм керәшен хәрәкәте активистлары да чакырылган.